Яндекс Go-дағы Жеткізу сервисі Еңбек және халықты әлеуметтік қорғау министрлігінің техникалық сауықтыру құралдарын (ТСҚ) жылдам жеткізу бойынша пилоттық жобасына қолдау көрсетеді. Мұндай құралдарға кресло-арбашалар, жүріс арбалары, тұтқалар, гигиеналық құралдар және басқа да тауарлар жатады. Біз әлдеқайда жылдам әрі уақтылы жеткізуді қамтамасыз етуге көмектесеміз — пайдаланушылар ТСҚ-ын бір күн ішінде ала алады. 

Есту және сөйлеу қабілеті нашар адамдар үшін біз Yandex SpeechKit технологиясы негізінде Яндекс Әңгіме қолданбасын жетілдіріп жатырмыз. Ол қазақ және орыс тіліндегі мәтінді таниды, мәтінді сөзге және сөзді мәтінге айналдырады, сөйлесу үшін дайын сөз тіркестерін ұсынады және диалогтар тарихын сақтайды. Қолданбаға қазақ тілін үйрету үшін әзірлеушілер командасы қазақша фонемалар (дыбыстар) мен сөздің айтылу ережелерін қамтитын аралас фонетикалық алфавитті жасады.

Яндекс Go сервисті есту қабілеті бұзылған жүргізушілер үшін бейімдеуде. Бұл оларға біздің платформа арқылы табыс табуға мүмкіндік береді. Яндекс Про қолданбасы 2018 жылдан бері құлағы естімейтін және нашар еститін жүргізушілер үшін қолжетімді бола бастады: жүргізуші қоңыраулар мен дыбыстық сигналдардың орнына жарықтық хабарландырулар алады, ал жолаушымен байланыс үшін сапар басталғанға дейін және оны орындау кезінде қолжетімді болатын чатты пайдалануға болады. 

Яндекс Браузер қолжетімділік баптауларына қолдау көрсетеді. Бұл функциялар пайдаланушыға браузерді өз қажеттіліктеріне сай бейімдеуге көмектеседі (мысалы, қаріп өлшемі, күңгірт тақырып, түсті түзету, субтитрлер). Мұндай баптауларды денсаулық ерекшеліктері бар адамдар, қарт адамдар және белгілі бір жағдайларда басқа да пайдаланушылар пайдаланады. iOS және Android жүйесіндегі Яндекс Браузер қолданбасының деректерін пайдалана отырып, біз зерттеу жүргіздік және Қазақстандағы пайдаланушылар қандай қолжетімділік баптауларын қосатынын анықтадық. Мәселен, пайдаланушылардың 51%-ы кем дегенде бір қолжетімділік баптауын пайдаланады, 36%-ы күңгірт тақырыпты қосады, 11%-ы қаріп өлшемін өзгертеді, ал 6%-ы экранды дыбыстау функциясын пайдаланады. Зерттеу нәтижелері бизнес пен әзірлеушілерге қанша пайдаланушыға қолжетімділік функциясының қолдауы қажет екендігін жақсырақ түсінуге, қолданбаларды пайдалы әрі ыңғайлы етуге, сондай-ақ жаңа аудиторияны тартуға көмектеседі.

Яндекс Go сервисінде тапсырыстарды орындау кезінде қауіпті жағдайлардың туындау қаупін азайтуға және жүргізушілер мен курьерлердің жайлылығын арттыруға көмектесетін шаралар кешені мен технологиялық шешімдер қолданылады. Олардың қатарына жеке деректерді қорғау, жолда жүру ережелерін сақтауға көмектесу, сапардың төленуін бақылау, оқиғаларды белсенді түрде анықтау, жүргізу мәнерін бақылау және тағы басқасы кіреді. Тапсырысты орындау кезінде тегін сақтандыру әрекет етеді: жол-көлік оқиғасы жағдайында зардап шеккен жүргізушіге немесе курьерге 4 миллион теңгеге дейін төлем төленуі мүмкін. 

Жарнама берушілер Директте нейрожелілердің көмегімен дайын хабарландырулар жасай алады: тіл моделі компания парақшасындағы ақпаратқа сүйене отырып тартымды хабарландыру тақырыбы мен мәтінін жазып береді, ал YandexART нейрожелісі сәйкес келетін кескінді салып береді. Мұндай функциялар әсіресе шағын бизнес өкілдері үшін пайдалы, себебі фототүсірілімге кететін уақыт мен шығындарды үнемдейді.  

Біз әзірлеген Yandex Cloud Boost бағдарламасы шеңберінде IT стартаптарды қолдаймыз және акселераторлармен, бизнес-инкубаторлармен және технопарктермен қызметтесеміз. Бағдарлама деңгейіне байланысты стартаптар Yandex Cloud сервистерін қолдана алады. Сондай-ақ компаниялар Yandex Cloud арқылы YandexGPT API сервисіне қолжетімділікті ала алады. Бұл сервис бизнес-қолданбалар мен веб-сервистерде генеративті нейрожелілерді пайдалануға мүмкіндік береді.

Сұлулық салондары мен барбершоптар Яндекс Карталарда онлайн жазылу функциясын тегін қоса алады: бұл клиенттер ағынын арттыруға, әкімшілердің жүктемесін азайтуға және мамандардың жүктемесін ыңғайлы бақылауға мүмкіндік береді. Сондай-ақ Яндекс Карталар API Яндекс Карталар деген брендпен бизнеске арналған картографиялық шешімдер желісін іске қосты. 2024 жылдың маусым айының соңына қарай оны 2,5 мыңнан астам клиент пайдаланды. Олардың қатарына интернет-дүкендер, бөлшек сауда желілері, курьерлік қызметтер және логистикалық компаниялар кіреді.

Біз Қазақстандағы Technovation Girls халықаралық бағдарламасына қаржылық және сарапшылық қолдау көрсетеміз. Аталған бағдарлама цифрлық технологиялар мен кәсіпкерлікке қызығатын қыз балаларға арналған. 2024 жылғы маусымда 2345 қатысушы өтініш берді, ал астаналық DigiDaisies командасы халықаралық финалға шықты. Компаниямыздың 90-нан аса қызметкері жобаны менторлар, сарапшылар, баяндамашылар және әділқазы мүшелері ретінде қолдады. Сондай-ақ біз технологиялық салаларда жұмыс істейтін әйелдерді біріктіретін TechnoWomen коммерциялық емес ұйымымен қызметтесеміз.

Yandex Cloud студенттерге, әзірлеушілерге және техникалық мамандарға бұлттық технологиялар саласында білімін жетілдіруге көмектеседі. Курстарды жетекші IT-компаниялардың архитекторлары мен инженерлері дайындаған және олар case study қағидасымен құрылған. Аталған қағида бизнестің шынайы міндетіне тереңдеп шолуға және оны бұлттық құралдардың көмегімен қадамдап шешуге негізделеді.

Ай сайын Яндекс Go сервисі серіктестерінің үздік жүргізушілері мына IT-курстардың бірін тегін оқи алады: Python тілінде бағдарлама жасақтау негіздері, деректерді талдауға арналған SQL дағдылары немесе Figma-дағы дизайн негіздері. Мұндай оқу жаңа мансаптық мүмкіндіктерге бірінші қадам жасауға көмектесуі мүмкін. Жүргізуші курстан өзі өте алады немесе оны өзінің туысқанына немесе досына бере алады. Сабақтар Яндекс Практикум платформасында онлайн өтеді, ал курсқа қолжетімділік біржола қалады.

Біз кәсіби IT қауымдастықты дамытуға ұмтыламыз және бейінді іс-шаралар ұйымдастырамыз. Мұндай іс-шараларда саладағы әріптестермен тәжірибе алмасуға, IT саласындағы өзекті трендтер туралы білуге және білімді өзекті етуге болады. Мұндай іс-шаралардың қатарына Алматыдағы бағдарлама жасақтау бойынша Yandex Cup халықаралық чемпионаты, IQ BBQ фестивалі, Yandex Cloud конференциялары мен вебинарлары, сондай-ақ алуан түрлі технологиялық бағыттар бойынша хакатондар, митаптар және интенсивтер кіреді. 

Яндекс Практикум цифрлық мамандықты басынан бастап меңгеруге немесе әрі қарай кәсіби даму үшін жаңа дағдыларды алуға көмектеседі. Платформада 100-ден аса бағдарлама бар: IT-мамандықтар бойынша да (мысалы, деректер аналитикасы немесе бағдарламалау), басқа цифрлық бағыттар бойынша да (дизайн, маркетинг, менеджмент).  Сондай-ақ Практикум Еңбек ресурстарын дамыту орталығымен қызметтесіп, Skills Enbek платформасында тегін білім беру курстарын орналастырып отырады. Бұл курстар IT саласында мансабын бастағысы келетіндер үшін жарамды.

Пайдаланушылар қайырымдылыққа қатыса алуы үшін, Yandex Qazaqstan жыл сайын «Жомарт қараша» акциясын өткізеді. Қатысу үшін Яндекс Go-да таксимен сапар жасау жеткілікті — жолдың әрбір 10 км үшін біз өз қаражатымыздан акция пайдасына 1 теңге жібереміз және қорытынды соманы екі есе арттырамыз. Жоба өткізілген екі жылда қайырымдылық көлемі 11 млн теңгеден асты — бұл сома «Милосердие» ерікті қоғамы», «Кең Жүрек», «Күн бала», «Қазақстанның SOS балалар ауылдары», «МБАҚ», «Тепло», «Өмірге сен», «Бәріміз бірге қатерлі ісікке қарсы» қайырымдылық ұйымдарының арасында үлестірілді. 

Біз жоғалған адамдарды іздеумен айналысатын LIDER.KZ еріктілер қозғалысымен қызметтесеміз. Еріктілерге көмектескісі келетін жүргізушілер мен курьерлер Яндекс Про қолданбасы арқылы жоғалған адамның фотосуретін, оның ерекше белгілерін, жоғалған күні мен орны туралы ақпаратты, сондай-ақ іздеу жасағымен байланысатын нөмірлерді алады. Олардың қатысуы нәтижелі түрде іздеуге көмектеседі, себебі такси жүргізушілері күні бойы қала ішінде жүреді, ал курьерлер жүргізушілер бармайтын жерлерге, мысалы, жолаушылар аймағына, аулаларға және үйлердің кіреберістеріне барады. 

2024 жылдың көктемінде болған сел кезінде Yandex Qazaqstan жергілікті халыққа қолдау көрсетті. Мәселен, Яндекс Go Қостанай облысындағы Қостанай және Тобыл елді мекендерінің тұрғындарын уақытша жайғастыру орындарына эвакуациялауға көмектесті. Сондай-ақ Қазақстан тұрғындарына Яндекс Go-мен жеткізу арқылы селден зардап шеккендер үшін заттарды ресми гуманитарлық көмек жинау орындарына небәрі 10 теңгеге жіберу мүмкіндігі берілді. Яндекс Карталарға гуманитарлық көмек жинау орындары, сондай-ақ уақытша жайғастыру орындары қосылған болатын. Төтенше жағдай туралы хабарландырулар және маңызды ақпарат пен аймақтар бойынша жедел желілердің контактілері Яндекс Іздеудің басты бетінде және Яндекс, Яндекс Карталар, Яндекс Браузер және Яндекс Go қолданбаларында қолжетімді болды.

Біз кәсіби даму үшін түрлі мүмкіндіктерді — білім беру бағдарламалары мен тренингтерді, профильдік іс-шаралар мен конференцияларды, мансап жолын өзгерту және жаңа бағыттарды көру мүмкіндігін ұсынамыз. Біздің Квант деп аталатын жеке білім беру платформамызда алуан түрлі тақырып бойынша 1800-ден астам курстар мен материалдар қолжетімді. Олардың қатарында өзіміз әзірлеген (соның ішінде қызметкерлердің өздері жасаған) тренингтер және сыртқы провайдерлердің оқыту бағдарламалары бар. 

Қызметкерлер қызмет нәтижелерін бағалаудан (ревью) тұрақты түрде өтеді. Бұл баға орындалған жобалар қорытындысы, әріптестердің пікірлері және жетекшінің кері байланысы бойынша құрылады. Біз түсінікті бағалау схемасын пайдаланамыз және бағаның қызметкердің табысына қалай әсер ететінін ашық түрде айтамыз. Мысалы, сыйлықақы айлық еңбекақының қандай бөлігін құрайды.

Біз қызметкерлеріміз үшін жайлы жұмыс кеңістігін құруға ұмтыламыз. Біздің Алматыдағы кеңсемізде ыңғайлы әрі кең жұмыс аймақтары, сондай-ақ көңілді сергітуге және жұмыстан демалуға болатын көп бөлмелер бар — мысалы, үстел теннисін немесе бильярд ойнауға, сондағы кофеханаға, массаж кабинетіне немесе спорт залына баруға болады.